افغانستان او پاکستان په پنځوس اوريزو لوبو هم توافق وکړ، خو پاکستان يو شرط هم وړاندې کړی
د پاکستان کرکټ بورډ (پي سي بي) د راتلونکو پنځلسو مياشتو لپاره د خبلې کرکټ ملي لوبډلې د لوبو معلومات خپاره کړي، چې له افغانستان سره به پنځوس اوریزه لوبلړۍ هم ترسره کړي.
د پاکستان کرکټ بورډ د مهالوېش له مخې، پاکستان لوبډله به د پنځلس میاشتو په موده کې له سریلانکا، اسټرالیا او ویسټ انډیز سره ۷ ټیسټ لوبې ترسره کړي.
همدغه راز پاکستان لوبډله به سږ کال د افغانستان او نیوزیلېنډ پر وړاندې ۸ یو ورځنۍ لوبې ترسره کوي او پنځوس اوریزه اسیا جام او نړیوال جام هم په همدې کال کې ترسره کېږي.
د مهالوېش له مخې، پاکستان کرکټ بورډ به له افغانستان سره درې پنځوس اوریزه لوبې د روان کال په اګست میاشت کې ترسره کړي، چې په غالب ګومان دا به د سوپر لیګ سیالۍ نه وي.
ځکه چې د افغانستان او پاکستان ترمنځ د سوپر لیګ لوبلړۍ لغوه شوې ده او پرځای یې د روان میاشتې په ۲۴مه نېټه شل اوریزه لوبلړۍ پیلېږي، چې له دې وروسته به بیا له نیوزیلېنډ سره لوبلړۍ وکړي.
